ചിക്കന്‍ ബ്രോത്ത്
ഓരോ കാലാവസ്ഥക്കും അനുസരിച്ചായിരിക്കണം സത്യത്തില്‍ നമ്മുടെ ഭക്ഷണവും ചിട്ടപ്പെടുത്തേണ്ടത്. ഇത്തരത്തില്‍ മഞ്ഞുകാലത്തിന് ഏറ്റവുമധികം യോജിക്കുന്നൊരു വിഭവമാണ് ബ്രോത്ത്.ഇവിടെയിപ്പോള്‍ നല്ല കിടിലനൊരു ചിക്കന്‍ ബ്രോത്തിന്‍റെ റെസിപിയാണ് പങ്കുവയ്ക്കുന്നത്.
ബ്രോത്തിനെ കുറിച്ച്‌ നിങ്ങളില്‍ മിക്കവരും നേരത്തെ തന്നെ കേട്ടിരിക്കും. രുചിയെക്കാളുപരി ഇതിന്‍റെ ആരോഗ്യഗുണങ്ങളെ കുറിച്ച്‌ തന്നെയായിരിക്കും അധികപേരും കേട്ടിരിക്കുക. ചിക്കന്‍ ബ്രോത്ത് ആണെങ്കില്‍ എല്ലുകളുടെയും പേശികളുടെയും ബലത്തിനും, ചര്‍മ്മാരോഗ്യം മെച്ചപ്പെടുത്തുന്നതിനും രക്തകോശങ്ങള്‍ക്കുമെല്ലാം ഒരുപോലെ ഗുണകരമാണ്.
ചിക്കന്‍ മാംസവും എല്ലുകളും സഹിതം മറ്റ് പച്ചക്കറികളും സ്പൈസുകളുമെല്ലാം കൂട്ടി വേവിച്ചെടുക്കുന്നതിന്‍റെ വെള്ളമാണ് ലളിതമായി പറയുകയാണെങ്കില്‍ ബ്രോത്ത്. ചിക്കന്‍ സ്റ്റോക്കില്‍ നിന്ന് നേരിയ വ്യത്യാസമേ ബ്രോത്തിനുള്ളൂ. പക്ഷേ പലരും ചിക്കന്‍ സ്റ്റോക്കും ബ്രോത്തും ഒന്നാണെന്നാണ് ധരിച്ചിരിക്കുന്നത്. സ്റ്റോക്ക് ആകുമ്പോള്‍ അത് എല്ലാണ് തിളപ്പിക്കുന്നത്. ബ്രോത്ത് നേരത്തേ സൂചിപ്പിച്ചത് പോലെ എല്ലാം കൂടി ചേര്‍ത്ത് വേവിക്കുന്നതിന്‍റെ വെള്ളമാണ്. ഇതിന് കുറെക്കൂടി രുചി കൂടുതലായിരിക്കുകയും ചെയ്യും.
ചിക്കന്‍ ബ്രോത്ത് തയ്യാറാക്കാന്‍
ചിക്കന്‍ ബ്രോത്ത് തയ്യാറാക്കാന്‍ വളരെ എളുപ്പമാണ്. ഇതിന് അല്‍പം ചിക്കന്‍ കഷ്ണങ്ങള്‍ (എല്ലോട് കൂടിയത്), ക്യാരറ്റ്, ഉള്ളി, സ്പൈസുകള്‍ (ഇഷ്ടാനുസരണം തെരഞ്ഞെടുക്കാം), ഇലകള്‍ (ബേ ലീഫ്, റോസ്മേരി, ഡ്രൈഡ് തൈം, പെപ്പര്‍കോണ്‍) എന്നിവ മാത്രം മതി.
ഒരു സൂപ്പ് കെറ്റിലില്‍ എല്ലാ ചേരുവകളും ചേര്‍ത്ത് വെള്ളവും ഒഴിച്ച്‌ പതിയെ തിളപ്പിച്ചെടുക്കാം. തിളച്ചുകഴിയുമ്പോള്‍ തീ ചെറുതാക്കി വയ്ക്കാം. ഇതുപോലെ 1-2 മണിക്കൂര്‍ ഇങ്ങനെ തന്നെ വയ്ക്കണം. മൂടിവക്കേണ്ടതില്ല. പത വരികയാണെങ്കില്‍ ഇത് കോരി മാറ്റാവുന്നതുമാണ്. ഇത്രയും സമയത്തിന് ശേഷം ഇത് വാങ്ങി വയ്ക്കാം.
തണുത്ത ശേഷം ചിക്കന്‍റെ മാംസം എല്ലില്‍ നിന്ന് മാറ്റി ഇത് മറ്റെന്തെങ്കിലും ഉപയോഗത്തിനായി മാറ്റിവക്കാം. എല്ലുകള്‍ കളയുകയോ മറ്റുപയോഗങ്ങള്‍ക്ക് എടുക്കുകയോ ചെയ്യാം. ഇനി ഉള്ളി ക്യാരറ്റ് പോലുള്ള പച്ചക്കറികളോ സ്പൈസുകളോ ഇലകളോ ഇങ്ങനെ ബാക്കി കിടക്കുന്ന ചേരുവകളെല്ലാം ഇതില്‍ നിന്ന് മാറ്റുക.
ഇനി ബ്രോത്ത് 4-5 മണിക്കൂര്‍ ഫ്രിഡ്ജില്‍ വയ്ക്കാം. അല്ലെങ്കിൽ രാത്രി മുഴുവനായി വയ്ക്കാം. ഇതിന് ശേഷം മുകളില്‍ വരുന്ന കൊഴുപ്പ് ഒരു സ്പൂണുപയോഗിച്ച്‌ മാറ്റി ബ്രോത്ത് ഉപയോഗിക്കാവുന്നതാണ്. ഫ്രിഡ്ജില്‍ സൂക്ഷിച്ചാലും അഞ്ച് ദിവസത്തില്‍ കൂടുതല്‍ ഇത് വയ്ക്കാതിരിക്കാന്‍ ശ്രദ്ധിക്കുക. അതുപോലെ ചൂടാക്കി വീണ്ടും ഫ്രിഡ്ജില്‍ വയ്ക്കാതിരിക്കാനും ശ്രദ്ധിക്കുക.
ആരോഗ്യഗുണങ്ങള്‍.
ചിക്കന്‍ ബ്രോത്തിന് പല ആരോഗ്യഗുണങ്ങളുമുണ്ട്. ഇത് നേരത്തേ സൂചിപ്പിച്ചുവല്ലോ. ദഹനം എളുപ്പത്തിലാക്കുന്നതിന്- പ്രത്യേകിച്ച്‌ ദഹനപ്രശ്നങ്ങള്‍ പതിവായവരില്‍, പല രോഗങ്ങളെയും ചെറുക്കുന്നതിന്, സന്ധികളുടെ ആരോഗ്യം മെച്ചപ്പെടുത്തുന്നതിന്, വണ്ണം കുറയ്ക്കാന്‍, ചര്‍മ്മത്തിന്‍റെ ആരോഗ്യം മെച്ചപ്പെടുത്തുന്നതിന് എല്ലാം സഹായകമാണ് ബ്രോത്ത്.
https://t.me/+jP-zSuZYWDYzN2I0
No comments:
Post a Comment