വെജിറ്റബിൾ ബിരിയാണി

എണ്ണയും നെയ്യും ചേർക്കാതെ രുചികരമായ വെജിറ്റബിൾ ബിരിയാണി

ചേരുവകൾ
റൈസ് – 2 കപ്പ്
സവാള – 1 എണ്ണം
പച്ചമുളക് – 1 എണ്ണം
ചിരകിയ തേങ്ങ– 4 ടേബിൾസ്പൂൺ
പുതിനയില - 1 ടേബിൾസ്പൂൺ
മല്ലിയില - ടേബിൾസ്പൂൺ
ഗരംമസാല – 1 ¼ ടീസ്പൂൺ
മഞ്ഞൾപ്പൊടി – ¼ ടീസ്പൂൺ
കാരറ്റ് –1 എണ്ണത്തിന്റെ പകുതി
ബീൻസ്–4 എണ്ണം
ബട്ടർ മഷ്റൂം –4 എണ്ണം
സോയാചങ്ക്സ് – 10 എണ്ണം
തക്കാളി – 1 എണ്ണം
വെള്ളം – ½ കപ്പ്
ഉപ്പ് – ആവശ്യത്തിന്
നാരങ്ങാ നീര് – 1 ടേബിൾ സ്പൂൺ
തേങ്ങാപ്പാൽ – ½ കപ്പ് (ആവശ്യമെങ്കിൽ)

റൈസ് തയാറാക്കാൻ
ഏലയ്ക്ക – 2 എണ്ണം
ഗ്രാമ്പൂ– 2 എണ്ണം
പട്ട– ചെറിയ കഷണം
വെള്ളം – 10 കപ്പ്


തയാറാക്കുന്ന വിധം

രണ്ട് കപ്പ് ബസ്മതി റൈസ് നന്നായി കഴുകി 20 മിനിറ്റ് നേരം വെള്ളത്തിൽ കുതിരാൻ വയ്ക്കുക. അതിനുശേഷം വലിയ ഒരു പാത്രത്തിൽ 10 ഗ്ലാസ് വെള്ളം ഒഴിച്ച് (രണ്ടേകാൽ ടീസ്പൂൺ ഉപ്പാണ് ഇവിടെ ഇട്ടിട്ടുളളത്) ഏലയ്ക്ക, ഗ്രാമ്പൂ, പട്ട എന്നിവ ഇട്ട് നന്നായി തിളപ്പിക്കുക. തിളച്ചു കഴിയുമ്പോൾ വേണമെങ്കിൽ ഏലയ്ക്ക, ഗ്രാമ്പൂ, പട്ട എന്നിവ ഒരു അരിപ്പ ഉപയോഗിച്ച് കോരിമാറ്റാം. ആ വെള്ളത്തിലേക്ക് കുതിർത്ത അരി ഊറ്റിയത് ഇട്ട് നല്ല തീയിൽ മുക്കാൽ വേവാകുന്നതു വരെ വേവിക്കുക(ഇവിടെ അരിവേകാൻ 8 മിനിറ്റാണ് എടുത്തത്). മുക്കാല്‍ വേവായ അരി ഒരു അരിപ്പയിലേക്ക് മാറ്റി അതിന്റെ നടുക്കായി ഒരു കുഴി പോലെ ആക്കി വയ്ക്കുക.

ഇനി കുറച്ചു മല്ലിയിലയും പുതിനയിലയും എടുത്ത് കഴുകി ചെറുതായി അരിഞ്ഞു വയ്ക്കുക. ഇതിലേക്ക് ഒരു പിടി ചിരകിയ തേങ്ങയും ഒരു ടീസ്പൂൺ ഗരംമസാലയും ചേർത്ത് നന്നായി തിരുമ്മി മാറ്റി വയ്ക്കുക. ഇനി 15 അണ്ടിപ്പരിപ്പും ഒരു പിടി ഉണക്ക മുന്തിരിയും കുറച്ച് വെള്ളത്തിൽ കുതിരാൻ വയ്ക്കുക. ഇനി കുറച്ച് സോയാ (10 എണ്ണം) ചൂടുവെള്ളത്തിൽ കുതിർത്തു വച്ച് രണ്ടു മൂന്നു പ്രാവശ്യം പിഴിഞ്ഞ് വെള്ളം മാറ്റി കട്ട് ചെയ്തു വയ്ക്കുക(ആവശ്യമങ്കിൽ മാത്രം) ഇനി പച്ചക്കറികൾ ഒരു കാരറ്റിന്റെ പകുതി, നാല് ബട്ടർ മഷ്റൂം, നാല് ബീൻസ് ഇവയെല്ലാം (കോളിഫ്ളവറും, ഗ്രീൻപീസും വേണമെങ്കിൽ ചേർക്കാം) അരിഞ്ഞ് മാറ്റി വയ്ക്കുക. ഇനി വേണ്ടത് ഒരു സവാള കനംകുറച്ച് നീളത്തിൽ അരിഞ്ഞത്, പച്ചമുളക് അരിഞ്ഞത്, വലിയ പുളിയില്ലാത്ത തക്കാളി നീളത്തിൽ അരിഞ്ഞത്. ഒരു ഗ്ലാസ് തേങ്ങ ചിരകിയതിലേക്ക് കാൽ ഗ്ലാസ് വെള്ളം ഒഴിച്ച് മിക്സിയിൽ നന്നായി അടിച്ച് പിഴിഞ്ഞെടുക്കുക. ഇത് ചേർത്തില്ലെങ്കിലും കുഴപ്പമില്ല. ഇത്രയും റെഡിയാക്കി വയ്ക്കുക.
ഇനി ഒരു കടായ് അടുപ്പിൽ വച്ച് അതിലേക്ക് പച്ചക്കറികൾ എല്ലാം ഇട്ട് സോയാ ചങ്ക്സും അണ്ടിപ്പരിപ്പും കിസ്മിസും ആവശ്യത്തിന് ഉപ്പും കാൽ ടീസ്പൂൺ മഞ്ഞൾപ്പൊടിയും ചേർത്ത് നന്നായി മിക്സ് ചെയ്യുക. ഇടത്തരം തീയിൽ ഇത് അടച്ചു വച്ച് വേവിക്കുക. ഒട്ടും വെള്ളം ചേർക്കരുത്. കുറച്ചു സമയം കഴിയുമ്പോൾ അടപ്പ് മാറ്റി കാൽ ഗ്ലാസ് ചൂടുവെള്ളം ഒഴിച്ചു കൊടുക്കുക. തണുത്ത വെള്ളം ഒഴിക്കരുത്. വീണ്ടും അടച്ച് വച്ച് വേവിക്കുക. പച്ചക്കറികള്‍ മുക്കാൽ വേവാകുമ്പോൾ തേങ്ങാപ്പാൽ ഒഴിച്ചു കൊടുക്കുക. ഉപ്പ് നോക്കി ആവശ്യമെങ്കിൽ ചേർക്കുക. വീണ്ടും 5 മിനിറ്റ് നേരം വേവിച്ചതിനുശേഷം പുതിന, മല്ലിയില, നാളികേരം, ഗരംമസാല എന്നിവ ചേർത്ത മിക്സ് ഇതിലേക്കിട്ട് നന്നായി മിക്സ് ചെയ്യുക. ഗരം മസാലയില്ലെങ്കിൽ ബിരിയാണി മസാല ചേർത്താലും മതി. പുളി നോക്കി ഒരു ടേബിൾ സ്പൂൺ നാരങ്ങാ നീരും ചേർത്തിളക്കുക.
ദം ചെയ്യാൻ വേണ്ടി ഒരു ദോശ തവ അടുപ്പിൽ വച്ച് അതിന്റെ മുകളിലായി ദം ചെയ്യാനുള്ള പാത്രം വച്ച് അതിലേക്ക് ചോറിന്റെ ഒരു ലെയർ ആദ്യം ഇട്ടുകൊടുക്കുക. അതിന്റെ മുകളിലായി മസാല ഇട്ടുകൊടുക്കുക. വേണമെങ്കിൽ ഇതിന്റെ മുകളിലായി ഗരംമസാലയും മല്ലിയിലയും പുതിനയിലും വിതറിക്കൊടുക്കാം. മുഴുവൻ ചോറും മസാലയും ഇങ്ങനെ ലെയർ ചെയ്യുക. അതിനുശേഷം അടച്ച് വച്ച് ഇടത്തരം തീയിൽ 10 മിനിറ്റ് നേരം ചൂടാക്കുക. (ഓവനിൽ ചെയ്യണമെന്നുള്ളവർക്ക് 1800 C 10 മിനിറ്റ് നേരം ബേക്ക് ചെയ്യുക ) 10 മിനിറ്റ് നേരം ദം ചെയ്തതിനുശേഷം നന്നായി മിക്സ് ചെയ്യുക. ഇതിന്റെ കൂടെ സാലഡും അച്ചാറും ചേർത്ത് കഴിക്കാം.
∙ബിരിയാണിയിൽ ഉപ്പ് കുറഞ്ഞു പോയാൽ ഉപ്പ് കുറച്ച് വെള്ളത്തിൽ മിക്സ് ചെയ്ത് ബിരിയാണിയിൽ ഇടയ്ക്ക് ഇടയ്ക്ക് തളിച്ചു കൊടുത്ത് നന്നായി മിക്സ് ചെയ്താൽ മതി.